കണ്ണൂർ: കണ്ണൂർ കൊയ്യത്ത് സ്കൂൾ ബസ് മറിഞ്ഞ് നിരവധി പേർക്ക് പരിക്ക്. മയ്യിൽ കൊയ്യത്ത് മർക്സ് ഇംഗ്ലീഷ് സ്‌കൂളിൻ്റെ ബസ് മറിഞ്ഞാണ് അപകടം. വിദ്യാര്‍ത്ഥികളടക്കം മുപ്പതോളം പേർക്കാണ് പരിക്കേറ്റത്. പരുക്കേറ്റവരെ കണ്ണൂരിലെ എകെജി ആശുപത്രിയിലും മയ്യിൽ സർക്കാർ ആശുപത്രിയിലും പ്രവേശിപ്പിച്ചു.
പരിക്കേറ്റ ആരുടേയും നില ഗുരുതരമല്ലെന്നാണ് വിവരം. 30 വിദ്യാര്‍ത്ഥികളും നാല് മുതിര്‍ന്നയാളുകളുമാണ് ബസിലുണ്ടായിരുന്നത്. മര്‍ക്കസ് സ്‌കൂളിലെ അധ്യാപകന്റെ വിവാഹ സല്‍ക്കാരത്തില്‍ പങ്കെടുക്കാനായി പോകുമ്പോഴാണ് അപകടം സംഭവിച്ചത്.
കൊയ്യത്ത് വളവില്‍ വെച്ച് നിയന്ത്രണം വിട്ട ബസ് തലകീഴായി മറിയുകയായിരുന്നു. മറിഞ്ഞ ബസ് ഒരു മരത്തിൽ തടഞ്ഞിരുന്നതിനാൽ വലിയ അപകടം ഒഴിവായി. ഹോസ്റ്റലില്‍ താമസിക്കുന്ന വിദ്യാര്‍ത്ഥികളാണ് ബസിലുണ്ടായിരുന്നത്. പരുക്കേറ്റവരെ അതുവഴി പോയ സ്വകാര്യ ബസ്സിലാണ് ആശുപത്രിയിൽ എത്തിച്ചത്.