കുന്ദമംഗലം: മോഷണം പോയ ബൈക്കിനെ പിന്തുടർന്നെത്തിയ പൊലീസിനു കിട്ടിയത് രണ്ടു ബൈക്ക് മോഷണക്കേസുകളിലെ പ്രതികളെ. എൻഐടി മെഗാ ഹോസ്റ്റലിന് സമീപം ഈ മാസം 8ന് മോഷണം പോയ ബൈക്കുമായി മാനിപുരം കരീറ്റിപറമ്പ് സ്വദേശി ഹബീബ് റഹ്മാൻ (24), മെഡിക്കൽ കോളജ് പൊലീസ് സ്റ്റേഷൻ പരിധിയിൽ നിന്നു മോഷണം പോയ ബൈക്കുമായി താമരശ്ശേരി സ്വദേശി ഫഹദ് (24) എന്നിവരാണ് കുന്ദമംഗലം പൊലീസിന്റെ പിടിയിലായത്.
വയനാട് സ്വദേശി നൈജൽ ബെനഡിക്ടിന്റെ ബൈക്ക് മോഷണം പോയ കേസുമായി ബന്ധപ്പെട്ട് അന്വേഷണം നടക്കുന്നതിനിടെ, കാണാതായ ബൈക്കിൽ ഒരാൾ പടനിലം ഭാഗത്തേക്ക് പോകുന്നതായി കുന്ദമംഗലം പൊലീസിന്റെ ക്യാമറയിൽ പതിഞ്ഞതിനെ തുടർന്ന് വാഹനം പിന്തുടർന്ന് നരിക്കുനിയിൽ നിന്നു ഹബീബ് റഹ്മാനെ ബൈക്ക് സഹിതം കസ്റ്റഡിയിലെടുക്കുകയായിരുന്നു. കസബ, ടൗൺ, താമരശ്ശേരി സ്റ്റേഷനുകളിലായി ഇയാളുടെ പേരിൽ ബൈക്ക് മോഷണത്തിന് മൂന്ന് കേസും കഞ്ചാവ് പിടികൂടിയ ഒരു കേസും കോരങ്ങാട് പിസി മുക്കിലെ കട ഷട്ടർ പൊളിച്ച് മോഷണം നടത്തിയ കേസും നിലവിലുണ്ട്.
കുന്ദമംഗലം പൊലീസിന്റെ വാഹന പരിശോധനയ്ക്കിടെ നിർത്താതെ പോയ ഫഹദിനെ നരിക്കുനി ഭാഗത്ത് നിന്നു കണ്ടെത്തി ചോദ്യം ചെയ്തപ്പോഴാണ് ഇയാൾ സഞ്ചരിച്ച ബൈക്ക് മെഡി.കോളേജ് പൊലീസ് സ്റ്റേഷൻ പരിധിയിൽ നിന്നു മോഷണം പോയതാണെന്ന് കണ്ടെത്തിയത്. നേരത്തേ വീട്ടിൽ നിന്നും 50 ഗ്രാം എംഡിഎംഎ പിടികൂടിയ കേസിലെ പിടികിട്ടാപ്പുള്ളിയാണ് ഫഹദ്.