കോഴിക്കോട്: പെരുമണ്ണയില്‍ കഞ്ചാവ് ഉപയോഗിച്ചശേഷം ബസ് ഓടിച്ച ഡ്രൈവര്‍ അറസ്റ്റില്‍. പന്തീരങ്കാവ് -കോഴിക്കോട് റൂട്ടില്‍ ഓടുന്ന ‘റോഡ് കിങ്’ എന്ന സിറ്റി ബസിലെ ഡ്രൈവറും പൊക്കുന്ന് കുറ്റിയില്‍താഴം സ്വദേശിയുമായ ഫൈജാസിനെയാണ് (30) അറസ്റ്റ് ചെയ്തത്. വ്യാഴാഴ്ച ഉച്ചയ്ക്ക് 12 മണിയോടെയാണ് സംഭവം.
ഫൈജാസ് കഞ്ചാവ് ഉപയോഗിച്ച ശേഷമാണ് വാഹനം ഓടിക്കുന്നതെന്ന് പോലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ പന്തീരങ്കാവ് പോലീസ് സംഘം പെരുമണ്ണയില്‍ വെച്ച് പരിശോധന നടത്തുകയായിരുന്നു. പരിശോധനയില്‍ ഫൈജാസില്‍ നിന്ന് കഞ്ചാവിന്റെ രൂക്ഷഗന്ധം അനുഭവപ്പെടുകയും പോക്കറ്റില്‍ നിന്ന് വലിക്കാന്‍ ഉപയോഗിച്ച കഞ്ചാവിന്റെ ബാക്കി കണ്ടെത്തുകയും ചെയ്തു.
തുടര്‍ന്ന് ഡ്രൈവറെയും ബസ്സും പന്തീരങ്കാവ് പോലീസ് കസ്റ്റഡിയില്‍ എടുത്തു. ഡ്രൈവറുടെ ലൈസന്‍സ് സസ്‌പെന്‍ഡ് ചെയ്യുന്നതിനായി റിപ്പോര്‍ട്ട് നല്‍കുമെന്ന് പന്തീരങ്കാവ് എസ്.ഐ സുഭാഷ് ചന്ദ്രന്‍ പറഞ്ഞു.