താമരശ്ശേരി: താമരശ്ശേരി ചുരത്തിൽ നിന്നും കൊക്കയിലേക്ക് വീണ് യുവാവ് മരിച്ചു. വടകര വളയം തോടന്നൂർ വരക്കൂർ സ്വദേശിയായ അമൽ (23) ആണ് മരിച്ചത്. ചുരം ഒൻപതാം വളവിൽ മൂത്രമൊഴിക്കാനിറങ്ങിയ യുവാവ് അബദ്ധത്തിൽ കൊക്കയിലേക്ക് തെന്നിവീഴുകയായിരുന്നു. ഞായറാഴ്ച അർദ്ധരാത്രി ഒന്നരയോടെയായിരുന്നു അപകടം.
കോഴിക്കോട്ടെ സ്വകാര്യ സ്ഥാപനത്തിലെ ഡ്രൈവറാണ് അമൽ. സഹപ്രവർത്തകർക്കൊപ്പം വയനാട്ടിലേക്ക് ട്രാവലർ വാഹനത്തിൽ വിനോദയാത്ര പോകുന്നിടെയാണ് ദാരുണമായ സംഭവം. അമൽ അടക്കം13 പേരാണ് ട്രാവലർ വാഹനത്തിൽ ഉണ്ടായിരുന്നത്. കൽപ്പറ്റയിൽ നിന്നെത്തിയ ഫയർഫോഴ്സ് സംഘമാണ് അമലിനെ കൊക്കയിൽ നിന്നും പുറത്തെടുത്തത്. മൃതദേഹം താമരശ്ശേരി താലൂക്ക് ആശുപത്രിയിൽ സൂക്ഷിച്ചിരിക്കുകയാണ്. പിതാവ്: രവി. മാതാവ്: സുമ.