എളേറ്റിൽ: കൊടുവള്ളി, എലത്തൂർ അസംബ്ലി നിയോജക മണ്ഡലങ്ങളെ ബന്ധിപ്പിച്ച് കിഫ്‌ബി പദ്ധതിയിൽ ഉൾപ്പെടുത്തി 45.27 കോടി രൂപ ചെലവിൽ നവീകരിക്കുന്ന പരപ്പൻപൊയിൽ - കാരക്കുന്നത് റോഡിന്റെ പ്രവൃത്തി ഉദ്ഘാടനവും, നവീകരണ പ്രവൃത്തി പൂർത്തിയായ പന്നൂർ- നരിക്കുനി- പുന്നശ്ശേരി റോഡിൻ്റെ ഉദ്ഘാടനവും പൊതുമരാമത്ത് ടൂറിസം വകുപ്പ് മന്ത്രി പി.എ മുഹമ്മദ് റിയാസ് നിർവഹിച്ചു. ഡോ. എം.കെ മുനീർ എം.എൽ.എ അധ്യക്ഷത വഹിച്ചു.
നാലു പഞ്ചായത്തുകളെയും ഒരു മുനിസിപ്പാലിറ്റിയേയും ബന്ധിപ്പിക്കുന്ന പ്രധാന പാതയായ പരപ്പൻപൊയിൽ - കാരക്കുന്നത്ത് റോഡ് പ്രവൃത്തി സമയബന്ധിതമായി പൂർത്തീകരിക്കുന്നതിന് ആവശ്യമായ നടപടികൾ സ്വീകരിക്കുമെന്ന് മന്ത്രി ഉദ്ഘാടന പ്രസംഗത്തിൽ സൂചിപ്പിച്ചു. പരമാവധി വേഗത്തിൽ പ്രവൃത്തി പൂർത്തീകരിക്കാൻ സാധിക്കുമെന്ന് പ്രത്യാശിക്കുന്നതായി എം.എൽ.എ അധ്യക്ഷ പ്രഭാഷണത്തിൽ പറഞ്ഞു.