കോഴിക്കോട്: കോഴിക്കോടിനെ ഞെട്ടിച്ച അരയിടത്തു പാലത്തെ വാഹനാപകടത്തിൽ കേസെടുത്ത് മെഡിക്കൽ കോളേജ് പോലീസ്. ബസ് ഡ്രൈവറെ കസ്റ്റഡിയിലെടുത്തു. അപകടത്തിൽ ബൈക്ക് യാത്രികനായ യുവാവ് ഇന്ന് മരിച്ചിരുന്നു. തുടർന്ന് സംഭവത്തിൽ കടുത്ത നടപടി എടുത്തിരിക്കുകയാണ് അധികൃതർ.
കൊണ്ടോട്ടിയിലെ ആശുപത്രിയിൽ നിന്നാണ് മുഹമ്മദ് ജംഷീറിനെ കസ്റ്റഡിയിലെടുത്തത്. അപകടത്തിന് പിന്നാലെ ഇയാൾ മറ്റൊരിടത്തേക്ക് മാറുകയായിരുന്നു. സംഭവത്തിൽ മെഡിക്കൽ കോളേജ് പൊലീസ് എഫ്ഐആര്‍ രജിസ്റ്റർ ചെയ്തിട്ടുണ്ട്. ബസ് തിരക്കുള്ള റോഡിൽ അശ്രദ്ധപൂർവം ഓടിച്ച്. അലക്ഷ്യമായും അപകടം വരുത്തുവിധവും വാഹനം ഓടിച്ചെന്നാണ് കേസ്.
ഇന്നലെ വൈകീട്ട് 4.15 ഓടെ ബസ് നിയന്ത്രണം വിട്ട് മറിഞ്ഞാണ് അപകടം ഉണ്ടായത്. അപകടത്തിൽ ഗുരുതരമായി പരിക്കേറ്റ് ചികിത്സയിലായിരുന്ന മുഹമ്മദ് സാനിഹാണ് ഇന്ന് മരിച്ചത്. ബസിനു മുന്നിലുണ്ടായിരുന്ന ബൈക്കിലെ യാത്രക്കാരനായിരുന്നു സാനിഹ്.