കൊടുവള്ളി: ഒന്നര കിലോ കഞ്ചാവുമായി ലഹരി കച്ചവടക്കാരൻ പിടിയിൽ. കൊടുവള്ളി കളരാന്തിരി കോളികെട്ടി കുന്നുമ്മൽ മഹേഷ് കുമാർ (46) നെയാണ് കോഴിക്കോട് റൂറൽ എസ്പി കെ.ഇ ബൈജു ഐപിഎസിൻ്റെ കീഴിലുള്ള സംഘം പിടികൂടിയത്. വീട്ടിൽ വെച്ച് കഞ്ചാവ് വിൽപ്പന നടത്തുന്നതിനിടെയാണ് ചൊവ്വാഴ്ച രാത്രി 10ന് വീട്ടുമുറ്റത്ത് വെച്ച് ഒന്നര കിലോഗ്രാം കഞ്ചാവുമായി ഇയാൾ പിടിയിലാവുന്നത്. പൊലിസിനെ കണ്ട് മയക്കു മരുന്നുമായി ഓടിരക്ഷപ്പെടാൻ ശ്രമിക്കുന്നതിനിടയിലാണ് ഇയാൾ പിടിയിലാവുന്നത്. കർണ്ണാടകയിൽ നിന്നും ഇടനിലക്കാർ വഴി എത്തിക്കുന്ന കഞ്ചാവ് പാക്കറ്റുകളാക്കി ജില്ലയിലെ വിവിധ ഭാഗങ്ങളിൽ വിൽപ്പന നടത്തുന്നതാണ് ഇയാളുടെ രീതി. പിടിച്ചെടുത്ത കഞ്ചാവിന് വിപണിയിൽ ഒരു ലക്ഷം രൂപ വിലവരും.
ഒന്നര വർഷം മുമ്പ് താമരശ്ശേരി കൂരിമുണ്ടയിൽ പൊലിസിനെയും നാട്ടുകാരെയും ആക്രമിച്ച് പൊലിസ് ജീപ്പ് തകർക്കുകയും യുവാവിനെ വെട്ടിക്കാപ്പെടുത്താൻ ശ്രമിക്കുകയും ചെയ്ത ചുരുട്ട അയൂബിൻ്റെ നേതൃത്വത്തിലുള്ള ലഹരി മാഫിയ സംഘത്തിൽപ്പെട്ടയാളാണ് മഹേഷ്. ഈ കേസിൽ മൂന്ന് മാസത്തോളം ഇയാൾ റിമാൻ്റിൽ കിടന്ന് ജാമ്യത്തിൽ ഇറങ്ങിയതാണ്. ലഹരിക്ക് അടിമയായ ഇയാൾ ഭാര്യയെയും ബന്ധുക്കളെയും വീട്ടിൽ നിന്നും പുറത്താക്കി വീട്ടിൽ വ്യാപകമായി മയക്കുമരുന്ന് ഉപയോഗവും, വിൽപ്പനയും നടത്തിവരികയാണ്. പ്രതിയെ താമരശ്ശേരി കോടതിയിൽ ഹാജരാക്കി റിമാൻഡ് ചെയ്തു.
നർക്കോട്ടിക്ക് സെൽ ഡിവൈഎസ്പി പ്രകാശൻ പടന്നയിൽ, താമരശ്ശേരി ഡിവൈഎസ്പി കെ.സുശീർ എന്നിവരുടെ നിർദ്ദേശ പ്രകാരം സ്പെഷ്യൽ സ്ക്വാഡ് എസ്ഐമാരായ രാജീവ് ബാബു, ബിജു പൂക്കോട്, പി.പി ജിനീഷ്, കൊടുവള്ളി എസ്ഐമാരായ അനൂബ്, ആൻ്റണി ക്ലീറ്റസ്.എസ്, സിപിഒ മാരായ പ്രസൂൺ, ഷിജു, ഹോംഗാർഡ് വാസു എന്നിവർ ചേർന്നാണ് പ്രതിയെ പിടികൂടിയത്.