എകരൂൽ: എകരൂലിൽ ബൈക്കും വാനും കൂട്ടിയിടിച്ച് രണ്ടുപേർക്ക് സാരമായി പരിക്കേറ്റു. ബൈക്ക് യാത്രക്കാരായ എകരൂൽ എസ്റ്റേറ്റ്മുക്ക് കരിന്തോറമ്മൽ അജയ് (24), അച്ഛന്റെ സഹോദരൻ എമ്മംപറമ്പ് ഓടക്കാളിക്കുന്നുമ്മൽ ചന്ദ്രമോഹൻ (49) എന്നിവർക്കാണ് പരിക്കേറ്റത്. താമരശ്ശേരി-കൊയിലാണ്ടി സംസ്ഥാന പതയും എകരൂൽ-പരപ്പിൽ റോഡും ചേരുന്ന ജങ്ഷനിൽ ഞായറാഴ്ച ഉച്ചയ്ക്ക് രണ്ടോടെയായിരുന്നു അപകടം.
പരപ്പിൽ ഭാഗത്തെ കല്യാണത്തിൽ പങ്കെടുത്തവരുമായി വരുകയായിരുന്ന വാൻ സംസ്ഥാനപാതയിലൂടെ വരുകയായിരുന്ന ബൈക്കുമായി കൂട്ടിയിടിച്ച് ബൈക്ക് യാത്രക്കാർ റോഡിലേക്കും ബൈക്ക് സംസ്ഥാന പാതയിലെ നടപ്പാതയിലേക്കും തെറിച്ചു വീഴുകയായിരുന്നു. നാട്ടുകാർ ചേർന്ന് അതേ വാഹനത്തിൽ തന്നെ പരിക്കേറ്റവരെ കോഴിക്കോട് മെഡിക്കൽ കോളേജ് ആശുപത്രിയിലെത്തിച്ചു. ഈ ജങ്ഷനിൽ അടുത്തിടെയായി അപകടം വർധിക്കുന്നതിനാൽ സുരക്ഷാ നടപടി സ്വീകരിക്കണമെന്ന് നാട്ടുകാരും വ്യാപാരികളും ആവശ്യപ്പെട്ടു.