താമരശ്ശേരി: താമരശ്ശേരിയിലെ മോഷണ പരമ്പര. പ്രതി പോലീസ് പിടിയിൽ. താമരശ്ശേരി പൊടുപ്പിൽ താമസിക്കുന്ന ഷാജിമോൻ (45) നാണ് പോലീസ് പിടികൂടിയത്. ഇയാൾ 60-ൽ അധികം മോഷണക്കേസുകളിലെ പിടികിട്ടാപ്പുള്ളിയാണ്. രണ്ടുമാസത്തിനിടെ താമരശ്ശേരി മേഖലയിൽ ഒൻപത് വീടുകളിൽ മോഷണം നടത്തിയ കള്ളനെ താമരശ്ശേരി പോലീസ് സാഹസികമായി പിടികൂടി.
മൂന്നു വർഷം മുമ്പാണ് ഇയാൾ പൊടുപ്പിൽ താമസമാക്കിയത്. പകൽ സമയത്ത് ഇൻട്രസ്റ്റിയിൽ ജോലിക്ക് പോയിക്കൊണ്ടിരുന്ന ഇയാൾ രാത്രിയിലാണ് മോഷണത്തിന് ഇറങ്ങുന്നത്. നാട്ടുകാരെ കയ്യിലെടുക്കാൻ പള്ളിയുമായി അടുത്ത ബന്ധം പുലർത്തി, സുബഹി നമസ്കാകാരത്തിന് കൃത്യമായി എത്തുകയും, മറ്റു പ്രാർത്ഥനാ ചടങ്ങുകളിൽ സജീവമായി പങ്കെടുക്കുകയും ചെയ്തു. ഇതിനാൽ ആർക്കും ഇയാളെ സംശയം തോന്നിയതുമില്ല.
കാറിൽ ബന്ദിപ്പൂർ വഴി കർണാടകയിലേക്ക് കടക്കാൻ ശ്രമിക്കുമ്പോൾ ഗൂഡല്ലൂരിൽ വെച്ച് അതി സാഹസികമായാണ് താമരശ്ശേരിയുടെ ഉറക്കം കെടുത്തിയ കള്ളനെ പോലീസ് പിടികൂടിയത്. ബന്ദിപ്പൂർ വനമേഖലയിലൂടെ ഇയാളുടെ കാറിനെ പിന്തുടർന്നെങ്കിലും ഇടക്ക് കാർ ഉപേക്ഷിച്ചു കടന്നു കളഞ്ഞു. തുടർന്ന് താമരശ്ശേരി സിഐ സായൂജ് കുമാറിൻ്റെ നേതൃത്വത്തിലുള്ള പോലീസ് സംഘം പ്രതിയെ പിടികൂടുന്നതിന് പലയിടങ്ങളിലായി വലവിരിക്കുകയായിരുന്നു.
ഗൂഡല്ലൂർ ബസ്സ്റ്റാൻ്റ് മൂത്രപ്പുരക്ക് സമീപം രണ്ടു മണിക്കൂറിധികം സമയമാണ് പോലീസ് കാത്തിരുന്നത്. പോലീസ് ക്രൈം സ്കോഡ് പ്രതിയുടെ ഓരോ നീക്കങ്ങളും പിന്തുടർന്നു. ഒടുക്കം പിടികൂടി താമരശ്ശേരിയിൽ എത്തിക്കുകയായിരുന്നു. ഇയാളുടെ വീട്ടിൽ പോലീസ് പരിശോധന നടത്തി. ഇയാൾ മോഷണത്തിനായി ഉപയോഗിച്ചിരുന്ന കാറും, ബൈക്കും പോലീസ് കസ്റ്റഡിയിലെടുത്തു.