കൊയിലാണ്ടി: കൊയിലാണ്ടിയിൽ ട്രാഫിക് പോലീസ് എഎസ്ഐക്ക് യുവാവിൻ്റെ മര്‍ദ്ദനം. സംഭവത്തില്‍ കൊയിലാണ്ടി എടക്കുളം സ്വദേശി നിഹാബ് അബൂബക്കർ റിമാന്‍ഡിൽ. ഇന്ന് രാവിലെ 10.20 ഓടെയായിരുന്നു സംഭവം.
ട്രാഫിക് സ്റ്റേഷനില്‍ ഫൈന്‍ ചെല്ലാന്‍ സംബന്ധിച്ച വിഷയവുമായി എത്തിയതായിരുന്നു നിഹാബ് അബൂബക്കര്‍. ആദ്യം സ്റ്റേഷനിലെത്തിയ ഇയാള്‍ ഫൈന്‍ സംബന്ധിച്ച കാര്യങ്ങള്‍ സംസാരിക്കുകയും തിരിച്ചുപോവുകയും ചെയ്തു. എന്നാൽ ഇയാൾ കുറച്ചുകഴിഞ്ഞ് വീണ്ടുമെത്തി എഎസ്ഐയെ മര്‍ദ്ദിക്കുകയായിരുന്നു. തുടർന്ന് പ്രതിയെ സംഭവ സ്ഥലത്തുവെച്ചു തന്നെ പോലീസ് കസ്റ്റഡിയിലെടുത്തു.
സംഭവത്തില്‍ ട്രാഫിക് പോലീസ് എ.എസ്.ഐ സജീവന് പരിക്കേറ്റിരുന്നു. എ.എസ്.ഐയുടെ യൂണിഫോം പിടിച്ചുവലിക്കുകയും ചവിട്ടുകയും ചെയ്തിട്ടുണ്ടെന്ന് പോലീസ് പറഞ്ഞു. പരിക്കേറ്റ എഎസ്എയെ കൊയിലാണ്ടി താലൂക്ക് ആശുപത്രിയില്‍ ചികിത്സ തേടിയിരുന്നു.