കോഴിക്കോട്: പന്തീരങ്കാവിൽ വീട്ടിലെ ഫ്രിഡ്ജ് വലിയ ശബ്ദത്തോടെ പൊട്ടിത്തെറിച്ച് കത്തി നശിച്ചു. തിങ്കളാഴ്ച പുലർച്ചെ 3.30 ഓടെ പന്തീരാങ്കാവ് പൂളങ്കര പാട്ടാഴത്തിൽ സൈഫുദ്ദീൻ്റെ വീട്ടിലാണ് അപകടം ഉണ്ടായത്. ഫ്രിഡ്ജിനു സമീപത്തുണ്ടായ വീട്ടുപകരണങ്ങളും കത്തിനശിച്ചു. വയറിങ്ങുകളും കത്തിയമർന്നു. അൽപം അകലെയായി ഉണ്ടായിരുന്ന ഗ്യാസ് സിലിണ്ടറിലേക്ക് തീ പടരാതിരുന്നതിനാൽ വൻ അപകടം ഒഴിവായി.
ഒരു വർഷം പഴക്കമുള്ള ഫ്രിഡ്ജ് ആണ് പൊട്ടിത്തെറിച്ചത്. വീടിൻ്റെ അടുക്കള ഭാഗത്താണ് തീ പടർന്ന് പിടിച്ചത്. വീടാകെ കരിയും പുകയും പരന്നിട്ടുണ്ട്. ശബ്ദം കേട്ട് ഉണർന്നവർ വെള്ളം ഒഴിച്ച് തീ കെടുത്തുകയായിരിന്നു. അപകടകാരണം വ്യക്തമായിട്ടില്ല. അപകട സമയത്ത് വീട്ടിൽ ഏഴുപേർ ഉണ്ടായിരുന്നങ്കിലും ആർക്കും പരുക്കില്ല.