കൊയിലാണ്ടി: കൊയിലാണ്ടിയില്‍ യാത്രക്കാരൻ ട്രെയിനില്‍ കുഴഞ്ഞുവീണ് മരിച്ചു. തിക്കോടി സ്വദേശി റൗഫ് (65) ആണ് മരിച്ചത്. രാവിലെ 7.10ന് കണ്ണൂർ -കോയമ്പത്തൂർ പാസഞ്ചർ ട്രെയിനിൽ തിക്കോടിയിൽ നിന്ന് കോഴിക്കോട് ഭാഗത്തേക്ക് പോവുകയായിരുന്നു റൗഫ്. ട്രെയിനിൽ ദേഹാസ്വാസ്ഥ്യം അനുഭവപ്പെടുകയും കുഴഞ്ഞു വീഴുകയുമായിരുന്നു.
ട്രെയിൻ കൊയിലാണ്ടിയിലെത്തിയ ഉടനെ യാത്രക്കാര്‍ നല്‍കിയ വിവരത്തെ തുടര്‍ന്ന് അഗ്നിരക്ഷാ സേനയെത്തി ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം കൊയിലാണ്ടി താലൂക്ക് ആശുപത്രി മോര്‍ച്ചറിയിലേക്ക് മാറ്റി. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.