പൊതുജനങ്ങളുടെ പരാതികള്‍ പരിഹരിക്കുന്നതിന് സര്‍ക്കാര്‍ വലിയ പ്രാധാന്യമാണ് നല്‍കുന്നത്. ഇതിന്റെ ഭാഗമായി വിവിധ തലങ്ങളില്‍ പല ഘട്ടങ്ങളിലായി അദാലത്തുകള്‍ സംഘടിപ്പിച്ചിരുന്നു. മന്ത്രിസഭയുടെ രണ്ടാം വാര്‍ഷികത്തോട് അനുബന്ധിച്ച് 2023 ഏപ്രില്‍- മെയ് മാസങ്ങളിൽ താലൂക്ക് ആസ്ഥാനങ്ങളില്‍ ‘കരുതലും കൈത്താങ്ങും’ എന്ന പേരില്‍ മന്ത്രിമാരുടെ നേതൃത്വത്തില്‍ പരാതി പരിഹാര അദാലത്ത് നടത്തിയിരുന്നു. ഇതിന്റെ തുടര്‍ച്ചയാണ് മന്ത്രിമാരുടെ നേതൃത്വത്തിലുള്ള താലൂക്ക് തല അദാലത്ത്.
പ്രകൃതി ദുരന്തങ്ങളുമായി ബന്ധപ്പെട്ടുള്ള ധനസഹായം, വന്യജീവി ആക്രമണത്തില്‍ നിന്നുള്ള സംരക്ഷണം, നഷ്ടപരിഹാരം തുടങ്ങിയ പരാതികള്‍ അദാലത്തില്‍ പരിഹരിക്കപ്പെടും. ഭൂമിസംബന്ധമായ പോക്കുവരവ്, അതിര്‍ത്തി നിര്‍ണയം, അനധികൃത നിര്‍മാണം, ഭൂമികയ്യേറ്റം, അതിര്‍ത്തി തര്‍ക്കം, വഴി തടസ്സപ്പെടുത്തല്‍ എന്നിവയും അദാലത്തില്‍ ഉന്നയിക്കാം. സര്‍ട്ടിഫിക്കറ്റുകള്‍ ലഭിക്കുന്നതിലെ കാലതാമസവും നിരസിക്കലും പരിഗണിക്കും. കെട്ടിട നിര്‍മ്മാണ ചട്ടങ്ങളുമായി ബന്ധപ്പെട്ട് കെട്ടിട നമ്പര്‍, നികുതി എന്നിവയും, വയോജന സംരക്ഷണം, പട്ടിക ജാതി/വർഗ വിഭാഗങ്ങള്‍ക്കുള്ള വിവിധ ആനുകൂല്യങ്ങള്‍, മത്സ്യബന്ധന തൊഴിലാളികളുമായി ബന്ധപ്പെട്ട വിഷയങ്ങളും അദാലത്തില്‍ പരിഹരിക്കപ്പെടും.
ശാരീരികവും മാനസികവുമായി വെല്ലുവിളി നേരിടുന്നവരുടെ പരാതികള്‍ക്കൊപ്പം ചികിത്സാ ആവശ്യങ്ങള്‍ക്ക്, റേഷന്‍ കാര്‍ഡ് സംബന്ധമായ പ്രശ്‌നങ്ങളും പൊതുജനങ്ങള്‍ക്ക് ഉന്നയിക്കാം. കാര്‍ഷിക വിളകളുടെ സംഭരണവും വിതരണവും, വിള ഇന്‍ഷുറന്‍സ്, വ്യവസായ സംരംഭങ്ങള്‍ക്കുള്ള അനുമതി, സ്‌കോളര്‍ഷിപ്പുകള്‍ സംബന്ധിച്ചുള്ള പരാതികളും അപേക്ഷകളും സമര്‍പ്പിക്കാം. കളക്ട്രേറ്റിലെയും ബന്ധപ്പെട്ട താലൂക്കിലെയും പരാതിയുമായി ബന്ധപ്പെട്ട വകുപ്പിലെയും ഉദ്യോഗസ്ഥരുടെ സാന്നിധ്യത്തിലാകും അദാലത്ത്.
അദാലത്ത് തിയ്യതികൾ
• ഡിസംബർ 9: കോഴിക്കോട് താലൂക്ക്
• ഡിസംബർ 10: വടകര
• ഡിസംബർ 12: കൊയിലാണ്ടി
• ഡിസംബർ 13: താമരശ്ശേരി
പരിഗണനാ വിഷയങ്ങൾ:
ഭൂമിയുമായി ബന്ധപ്പെട്ട പ്രശ്നങ്ങൾ, ലൈസൻസ്/സർട്ടിഫിക്കറ്റ് വൈകുന്നത്, വയോജന സംരക്ഷണം, പെൻഷൻ, കാർഷിക, പരിസ്ഥിതി, ആരോഗ്യ മേഖല, റേഷൻ കാർഡ്, സ്കോളർഷിപ്പ്, നഷ്ടപരിഹാര ആവശ്യങ്ങൾ എന്നിവ.
അദാലത്തുകൾക്ക് മന്ത്രിമാരായ പി.എ മുഹമ്മദ് റിയാസ്, എ.കെ ശശീന്ദ്രൻ നേതൃത്വം നൽകും.
Tags:
KOZHIKODE