ഉള്ളിയേരി: ഉള്ളിയേരി കൂമുള്ളിയിൽ ബസ്സും ബൈക്കും കൂട്ടിയിടിച്ച് ബൈക്ക് യാത്രക്കാരൻ മരിച്ചു. മലപ്പുറം മുന്നിയൂർ സ്വദേശി രതീപ് നായർ (30) ആണ് മരിച്ചത്. കോഴിക്കോട്- കുറ്റ്യാടി റൂട്ടിൽ സർവീസ് നടത്തുന്ന ഒമേഗ ബസ് എതിരെ വന്ന ബൈക്കിൽ ഇടിക്കുകയായിരുന്നു. ഇന്ന് വൈകുന്നേരം 3 മണിയോട് കൂടി കൂമുള്ളി മില്‍മ സൊസൈറ്റിയ്ക്ക് സമീപമാണ് അപകടം.
തെറ്റായ ദിശയിൽ അമിത വേഗതയിലെത്തിയ ബസ്സിന്റെ വലതു വശത്ത് തട്ടി ബൈക്കുകാരൻ തെറിച്ചു വീഴുകയായിരുന്നു എന്നാണ് ലഭിക്കുന്ന വിവരം. റോഡില്‍ വീണ യുവാവിൻ്റെ കാലിന് മുകളിലൂടെ ബസ്സ് കയറിയിറങ്ങി. നാട്ടുകാര്‍ ചേര്‍ന്ന് മൊടക്കല്ലൂര്‍ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. ഈ റൂട്ടിൽ ബസുകളുടെ അമിത വേഗതയെ തുടർന്ന് നിരവധി ജീവനുകളാണ് കഴിഞ്ഞ ഒരു വർഷത്തിനിടെ പൊലിഞ്ഞത്.