കോഴിക്കോട്: സ്റ്റീൽ പാത്രം തലയിൽ കുടുങ്ങിയ ഒന്നരവയസുകാരിയെ അഗ്നിരക്ഷാസേന രക്ഷപ്പെടുത്തി. ചേലേമ്പ്ര ഇടി മുഴിക്കൽ സ്വദേശികളായ ഉസ്‌മാൻ -ആഷിഫ ദമ്പതികളുടെ മകൾ ഐസലിയ്ക്കാണ് അപകടം സംഭവിച്ചത്. കളിച്ചു കൊണ്ടിരിക്കുന്നതിനിടയിൽ കുട്ടിയുടെ തലയിൽ സ്റ്റീൽ പാത്രം അബദ്ധത്തിൽ കുടുങ്ങുകയായിരുന്നു.
ഇന്നലെ രാത്രി 8.30 ഓടെയായിരുന്നു സംഭവം. വീട്ടുകാർ ആദ്യം രക്ഷാപ്രവർത്തനത്തിന് ശ്രമം നടത്തിയെങ്കിലും ഫലമുണ്ടായില്ല. കുട്ടി ഭയന്ന് നിലവിളിച്ചതോടെ വീട്ടുകാർ കുട്ടിയെ മീഞ്ചന്ത അഗ്നിരക്ഷ നിലയത്തിൽ എത്തിച്ചു. തുടർന്ന് സേനാംഗങ്ങളുടെ ഒന്നരമണിക്കൂർ നേരത്തെ തീവ്ര പരിശ്രമത്തിന് ശേഷമാണ് കുട്ടിക്ക് യാതൊരു പരിക്കുമേൽക്കാതെ സ്റ്റീൽ പാത്രം തലയിൽ നിന്നും മുറിച്ചെടുത്ത് രക്ഷപ്പെടുത്തിയത്.
സ്‌റ്റേഷൻ ഓഫിസർ എംകെ പ്രമോദ് കുമാറിൻ്റെ നേതൃത്വത്തിലുള്ള, സീനിയർ ഫയർ & റെസ്ക്യൂ ഓഫിസർമാരായ എസ്‌ബി സജിത്, പിഎം ബിജേഷ്, ഫയർ & റെസ്ക്യു ഓഫിസർമാരായ പി അനൂപ്, എസ് അരുൺ, എൻ സുബാഷ്, പി ബിനീഷ്, ഫയർ വുമ മാരായ സികെ അശ്വനി, ബി ലിൻസി, ഹോം ഗാർഡർമാരായ കെടി നിതിൻ, കെ വേലായുധൻ, കെ സത്യൻ, കെ സന്തോഷ് എന്നിവർ ചേർന്നാണ് രക്ഷാപ്രവർത്തനം നടത്തിയത്.