കൊടുവള്ളി: മൂന്ന് നാൾ അരങ്ങ് തകർത്താടിയ ആവേശകരമായ കലാസ്വാദനങ്ങൾക്ക് പരിസമാപ്തി കുറിച്ചുകൊണ്ട് കൊടുവള്ളി ഉപജില്ലാ സ്കൂൾ കലോത്സവത്തിന് സമാപനം. മടവൂർ ചക്കാലക്കൽ സ്കൂളിൽ നടന്ന ഇഞ്ചോടിച്ച് പോരാട്ടത്തിൽ ആതിഥേയരായ ചക്കാലക്കൽ എച്ച് എസ് എസ് ചാമ്പ്യന്മാരായി. ഹയർസെക്കൻഡറി, ഹൈസ്കൂൾ വിഭാഗത്തിലാണ് ചക്കാലക്കൽ സ്കൂൾ കിരീടം ചൂടിയത്. യുപി വിഭാഗത്തിൽ ആവിലോറ, ഹസനിയ, എരവന്നുർ സ്കൂളുകൾ കിരീടം പങ്കിട്ടു. എൽപി വിഭാഗത്തിൽ ഹസനിയ മുട്ടാഞ്ചേരിയുടെ വിജയകുതിപ്പ്. അത്യന്തം ആവേശകരമായ അവസാന നിമിഷത്തിൽ ഹൈസ്കൂൾ വിഭാഗത്തിൽ അവസാന സമയം വരെ മുന്നിലായിരുന്ന എം ജെ എച്ച് എസ് എസ് എളേറ്റിലിനെ പിന്നിലാക്കിയാണ് ചക്കാലക്കൽ ഹൈസ്കൂൾ കലാകിരീടം നേടിയത്.
സമാപന ചടങ്ങ് ഡോ.എം.കെ മുനീർ എം.എൽ.എ. ഉദ്ഘാടനം ചെയ്തു. സ്കൂൾ കലോത്സവങ്ങൾ സാംസ്കാരിക ഔന്നിത്യത്വത്തിൻ്റെ ഉറവിടമാണെന്ന് എം എൽ എ പറഞ്ഞു. വിദ്യയുടെ സമ്പൂർണ്ണത കൈവരുന്നത് കലാ സാംസ്കാരിക മുന്നേറ്റത്തിലൂടെയാണെന്നും അദ്ദേഹം അഭിപ്രായപ്പെട്ടു. ചടങ്ങിൽ എ. ഇ. ഒ ,സി.പി അബ്ദൽ ഖാദർ അധ്യക്ഷനായി. കുന്ദമംഗലം എം.എൽ.എ അഡ്വ. പി.ടി.എ റഹിം മുഖ്യതിഥിയായി. പ്രമുഖ മാപ്പിളപ്പാട്ട് നിരൂപകൻ ഫൈസൽ എളേറ്റിൽ മുഖ്യ പ്രഭാഷണം നടത്തി. ബി.പി.ഒ മെഹറലി, പൂർവ്വ വിദ്യാത്ഥി പ്രതിനിധി സഹീർ സ്റ്റോറീസ് എന്നിവർ സമ്മാനദാനം നടത്തി.
ചേളന്നൂർ ബ്ലോക്ക് പഞ്ചായത്ത് പ്രസിഡൻ്റ് കെ സുനിൽകുമാർ, ഓമശ്ശേരി ഗ്രാമപ്പഞ്ചായത്ത് പ്രസിഡൻ്റ് പി.കെ ഗംഗാധരൻ, മടവൂർ ഗ്രാമപ്പഞ്ചായത്ത് മെമ്പർമാരായ ഷക്കീല ബഷീർ, ഷിൽന ഷിജു, പുറ്റാൾ മുഹമ്മാദ്, രാഘവൻ അടുക്കത്ത്, ബുഷ്റ പൂളോട്ടുമ്മൽ, ലളിത കടുകം വള്ളി, പ്രജീന അഖിലേഷ്, എം.പി ബാബു, സിറാജ് ചെറുവലത്ത്, സ്കൂൾ മാനേജർ സുലൈമാൻ മാസ്റ്റർ, കേഡിനേഷൻ കമ്മിറ്റി വൈസ് ചെയർമാൻ പി.എം ശ്രീജിത്ത്, റാഫി ചെരച്ചോറ, സി മുസ്തഫ, ഷറിൻ എന്നിവർ സംബന്ധിച്ചു. സ്വാഗത സംഘം ജനറൽ കൺവീനർ ടി.കെ ശാന്തകുമാർ സ്വാഗതവും, പ്രോഗ്രാം കമ്മിറ്റി കൺവീനർ കമറുദ്ദീൻ എളേറ്റിൽ നന്ദിയും പറഞ്ഞു