അത്തോളി: അത്തോളി കുനിയിൽ കടവ് ജംഗ്ഷനിൽ റോഡ് മുറിച്ച് കടക്കുന്നതിനിടെ ബസ്സിടിച്ച് കാൽനട യാത്രക്കാരന് ദാരുണാന്ത്യം. അത്തോളി കണിയാർ വയൽ വീട്ടിൽ ഇമ്പിച്ചിമമ്മദ് (85) ആണ് മരിച്ചത്. ചൊവ്വാഴ്ച വൈകീട്ട് 4 മണിയോടെ കുനിയിൽകടവ് റോഡിലെ സലൂൺ കടയിൽ നിന്നും മുടിവെട്ടി വീട്ടിലേക്ക് മടങ്ങുന്നതിനിടെയായിരുന്നു അപകടം.
കുറ്റാടി-കോഴിക്കോട് റൂട്ടിൽ സർവീസ് നടത്തുന്ന കെഎൽ 18 കെ 1161 ബ്രഹ്മാസ്ത്രം ബസ്സാണ് അപകടത്തിനിടയാക്കിയത്. തലക്ക് പുറകിൽ പരിക്കേറ്റ ഇമ്പിച്ചി മമ്മദിനെ ഉടൻ തന്നെ സഹകരണ ആശുപത്രിയിൽ പ്രവേശിപ്പിച്ചു. തുടർന്ന് പരിക്ക് ഗുരുതരമായതിനാൽ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയായിരുന്നു. വൈകീട്ട് 6.30 ഓടെയായിരുന്നു അന്ത്യം.
ഭാര്യ: ജമീല (തലയാട്). മക്കൾ: ഹമീദ്, പരേതനായ അഷറഫ്, മുനീർ, റസീന (തലയാട്), ഇർഷാദ് (സൗദി അറേബ്യ), അൻവർ (സിവിൽ എഞ്ചിനിയർ- വെസ്റ്റ്ഹിൽ). ഖബറടക്കം പോസ്റ്റ്മോർട്ടം നടപടികൾക്ക് ശേഷം ബുധനാഴ്ച അത്തോളി കുനിയിൽ ജുമാമസ്ജിദ് ഖബർസ്ഥാനിൽ.