കോഴിക്കോട്: വടകര പുതിയ ബസ് സ്റ്റാൻഡിന് സമീപം കടവരാന്തയിൽ വയോധികനെ കൊല്ലപ്പെട്ട നിലയിൽ കണ്ടെത്തിയ സംഭവത്തിൽ പ്രതി പിടിയിൽ. കൊയിലാണ്ടി പൊയിൽകാവ് സ്വദേശി നായർ സജിത്തെന്ന സജിത്താണ് അറസ്റ്റിലായത്. കഴിഞ്ഞ സെപ്തംബർ 18 ന് രാവിലെയാണ് അഞ്ജാതനായ വയോധികനെ മരിച്ച നിലയിൽ കണ്ടെത്തിയത്.
കഴുത്തിൽ തുണി മുറിക്കിയതിനാൽ മരണത്തിൽ ദുരൂഹതയുണ്ടെന്ന് പോലിസ് തുടക്കം മുതൽ സംശയം പ്രകടിപ്പിച്ചിരുന്നു. പോസ്റ്റ് മോർട്ടം റിപ്പോർട്ടിൽ മരണം കൊലപാതമാണെന്ന് സ്ഥിരീകരിച്ചതോടെയാണ് പൊലീസ് അന്വേഷണം ഊർജ്ജിതമാക്കിയത്. തുടർന്ന് ബസ് സ്റ്റാൻഡുകളിൽ അന്തിയുറങ്ങുന്നവരെ കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് പ്രതി പിടിയിലായത്.
സംഭവ ദിവസം കൊല്ലപ്പെട്ട വയോധികനും സജിത്തും ഒരുമിച്ചിരുന്ന് മദ്യപിച്ചിരുന്നെന്നും തുടർന്ന് ഇരുവരും തമ്മിലുണ്ടായ തർക്കത്തിനിടെ പുതപ്പ് കഴുത്തിൽ മുറുക്കി കൊലപ്പെടുത്തുകയായിരുന്നെന്നും പോലിസ് പറഞ്ഞു. വടകര സിഐ എൻ.സുനിൽകുമാറിന്റെ നേതൃത്വത്തിൽ എസ്ഐമാരായ പ്രകാശൻ, മനോജ് രാമത്ത്, എഎസ്ഐമാരായ വിനീഷ്, ഷാജി എന്നിവരുൾപ്പെട്ട സംഘമാണ് അന്വേഷണം നടത്തിയത്. പ്രതിയെ കോടതിയിൽ ഹാജരാക്കി 14 ദിവസത്തേക്ക് റിമാൻഡ് ചെയ്തു.